August 23, 2014

މި މަހުގެ ހަތް ވަނަ ދުވަހުން ފެށިގެން ގެއްލިގެން ހޯދަމުން އަންނަ މިނިވަން ނިއުސްގެ ނޫސްވެރިޔާ އަހްމަދު ރިލްވާން އަބްދުﷲއާ ބެހޭ ސައްހަ މައުލޫމާތެއް ހިއްސާކުރާ ފަރާތަކަށް އިނާމެއްގެ ގޮތުގައި 50،000ރ. ދޭން އޭނާގެ އާއިލާ އިން ނިންމައިފި އެވެ.

“މޮޔަމީހާ”ގެ ނަމުން ޝޯޝަލް މީޑިއާގައި މަޝްހޫރު ވެފައިވާ އުމުރުން 28 އަހަރުގެ ރިލްވާންގެ އެއްބަނޑު އެއްބަފާ ބޭބެ، މޫސާ ރިލްވާން މިއަދު ބުނި ގޮތުގައި އޭނާގެ ކޮއްކޮއާ ބެހޭ މައުލޫމާތު އާއިލާއާ ހިއްސާކުރާ ފަރާތްތަކުގެ ނަމެއް އާންމެއް ނުކުރާނެ އެވެ. އަދި ފައިސާގެ އިނާމު ދޭނީ، ލިބޭ މައުލޫމާތުތައް ފުލުހުންނާ ގުޅިގެން ބެލުމަށް ފަހު، ސައްހަ މައުލޫމާތު ހުށަހަޅާ ފަރާތަކަށް ކަމަށް އޭނާ ބުންޏެވެ.

“އަޅުގަނޑުމެންގެ ވަރަށް ބޮޑު އެދުމެއް ކޮއްކޮއާ ގުޅޭ ގޮތުން ކިތަންމެ ކުޑަ މައުލޫމާތެއް ވިޔަސް އެ މައުލޫމާތެއް ހިއްސާކުރުން،” މޫސަ ބުންޏެވެ.

މާލެ އާއި ހުޅުމާލޭގެ އިމާރާތްތަކާއި ގޭގޭގައި ހުރި ސީސީޓިވީ ކެމެރާތަކަށް ރިލްވާން އަރާފައި ހުރިތޯ ބަލައި ދިނުމަށް ވެސް އެ އާއިލާ އިން އެދެ އެވެ. އަދި ރިލްވާން ކަމަށް ޝައްކު ކުރެވޭ މީހަކު ސީސީޓީވީ ފުޓޭޖްތަކުން ފެންނަ ނަމަ އެކަން ލަސްނުކޮށް ހިއްސާ ކުރުމަށް އެ މީހުން އެދެ އެވެ.

ރިލްވާން އެންމެ ފަހުން ފެނިފައިވަނީ މި މަހުގެ ހަތް ވަނަ ދުވަހުގެ ރޭ ހުޅުމާލެ އަށް ދިއުމަށްޓަކައި ފެރީ ޓާމިނަލަށް ވަންނަނިކޮށެވެ. އެ މަންޒަރު ފެރީ ޓާމިނަލްގެ ސީސީޓިވީ އަށް ވަނީ އަރައިފަ އެވެ. އޭރު އޭނާ ލައިގެން ހުރީ ކަޅު ކުލައިގެ ގަމީހަކާއި ފަޓްލޫނެކެވެ.

ރިލްވާން ގެއްލުނު ރޭ، އޭނާ ދިރިއުޅޭ އެޕާޓްމަންޓް ހުންނަ އިމާރާތުގެ ކުރިމަތިން މީހަކު ގަދަކަމުން ކާރަކަށް އަރުވައިގެން ގެންދިޔަ މަންޒަރު މީހަކަށް ފެނިފައިވެ އެވެ. އެ މައްސަލަ އޭނާ ފުލުހުންނަށް ރިޕޯޓް ވެސް ކުރި އެވެ.

ރިލްވާނާ ގުޅޭ އެއްވެސް މައުލޫމާތެއް އެނގިއްޖެ ނަމަ ހިއްސާކުރަން ގުޅާނީ 7791120 ނުވަތަ
7773250 އަށެވެ.