August 27, 2014

ގެއްލިގެން ހޯދާ ނޫސްވެރިޔާ އަހުމަދު ރިލްވާން ހޯދުމުގައި ފުލުހުންނަށް އެހީތެރިވުމަށް، މެރިން ޕޮލިސް އާއި ގުޅިގެން މޯލްޑިވްސް ކޯސްޓްގާޑުގެ ޑައިވަރުން އެކި ސަރަހައްދުތަކުގައި ޑައިވް ކުރަމުންދާ ކަމަށް އެމްއެމްޑީއެފް އިން ބުނެފި އެވެ.

އެމްއެންޑީއެއްފެ މީޑިއާ އޮފިޝަލް މޭޖަރ ހުސެއިން އަލީ ވިދާޅުވީ އެމްއެންޑީއެފް އިން ޑައިވް ކުރާ ވަކި ސަރަހައްދުތަކެއް ހާމަނުކުރައްވާނެ ކަމަށާއި، އެ މައުލޫމާތު ހިއްސާ ކުރަމުންދާނީ ފުލުހުންނާ ކަމަށެވެ.

އަދި ފުލުހުން ރިލްވާން ހޯދުމުގެ މަސައްކަތް ކުރަމުންދާ މި ދަނޑިވަޅުގައި އެމްއެންޑީއެފްގެ ޑައިވަރުންގެ ޓީމުން އެހީތެރިކަން ފޯރު ކޮށްދެއްވަމުން ގެންދަވަނީ ހޯމް މިނިސްޓްރީގެ އެދުމުގެ މަތިން ކަމަށްވެސް ހުސެއިން އަލީ ވިދާޅުވިއެވެ.
އެމްއެންޑީއެފް އާއި ގުޅިގެން ރިލްވާން ހޯދުމަށް ޑައިވް ކުރާ ސަރަހައްދުތަކަކީ ހުޅުމާލެ ފަޅުގެ ބޮޑު ސަރަހައްދަކާއި ވަށައިގެންވާ އުރަފަށުގެ ސަރަހައްދެއް ކަމަށް މައުލޫމާތު ލިބިފައިވެ އެވެ.

އަދި މާލެއާ ކައިރި ފަޅު ރަށްތަކާއި އަތޮޅު ތެރޭގެ ބައެއް ރަށްރަށް ވެސް މިހާތަނަށް ބަލައި ފާސްކޮށްފައިވާ އިރު ބޮޑެތި ރަށްރަށަށް ވައިގެ މަގުންނާއި ކަނޑު މަގުން ދަތުރުކުރާ އުޅަނދު ފަހަރާއި މާލެއާއި ހުޅުމާލޭގެ ފަޅުގައިހުރި ބައެއް އުޅަނދުތައް ވެސް ބަލައި ފާސްކުރަމުންދާ ކަަމަށް ފުލުހުން ބުނެއެވެ.

ރިލްވާން ވީނުވީ ތަނެއް ނޭނގި ގެއްލިފައިވާ ކަން އާއިލާއިން ފުލުހުންނަށް ހުށަހެޅީ މިމަހުގެ 13 ވަނަ ދުވަހު 13:15 ހާއިރު ކަމަށް ފުލުހުން ބުނެ އެވެ.

އެއަށްފަހު ރިލްވާން ހޯދުމަށާއި މިމައްސަލަ ތަޙުގީގު ކުރަން ފަށާފައިވާ ކަމަށާއި، ރިލްވާން ހޯދުމަށް މިހާތަނަށް ހުޅުމާލޭގައި މީހުން ދިރިއުޅޭ ސަރަހައްދުތަކާއި ސިނާޢީ މަސައްކަތްތައް ކުރާ ސަރަހައްދުތަކުގެ އިތުރުން މީހުން ދިރި ނޫޅޭ ސަރަހައްދުތައް ވެސް އެއްކޮށް ބަލައި ފާސްކޮށް ނިމިފައިވާ ކަމަށް ފުލުހުން ބުނެެ އެވެ.

އަދި ފުލުހުންނަށް ލިބޭ ތަފާތު މަޢުލޫމާތުގެ މައްޗަށް ބިނާކޮށް މީހުން ދިރިއުޅޭ ބައެއް ފްލެޓްތަކާއި ތަންތަނާއި ގެސްޓް ހައުސް ފަދަ ތަންތަން ވެސް ބަލައި ފާސްކުރަމުންދާ ކަމަށް ފުލުހުން ބުނެ އެވެ.