August 19, 2014

މިނިވަން ނޫހުގެ ނޫސްވެރިޔާ ރިލްވާން ގެއްލިއްޖެ. މިއީ ރާއްޖޭގެ މިއަދުގެ ޙާލަތު ހުރިގޮތުން ފުރަތަމަ މީހުން އެހާ ސިހުން ގެނުވި ޚަބަރަކަށް ނުވިއެވެ. ސަބަބަކީ އުމުރުން 18 އަހަރުން ދަށުގެ ކުދިންވެސް އެއްފަހަރަށްވުރެ ގިނަފަހަރު ޢާއިލާއަށް ފިލައިގެން އުޅުމާއި ވީ ނުވީއެއް ނޭނގިގެން ޢާއިލާއިން ބައެއް މީހުން ހޯދުމާއި އުޅޭތަނެއް ނާންގާ އުޅޭއިރުވެސް ޢާއިލާއިން ކަންބޮޑު ނުވުންފަދަ ކަންކަން ހިނގުން ޢާއްމު ވަމުން އަންނާތީއެވެ.

ހަމަ މިބީދައިން މިނިވަން ނޫހުގެ ނޫސްވެރިޔާ އަދި ސޯޝަލް މީޑިޔާގައި “މޮޔަމީހާ” ގެ ނަމުން މަޝްހޫރު ރިލްވާން ގެއްލުމުންވެސް ފުރަތަމަ ކޮޅު މާބޮޑު ކަމަކަށް ނުވިއެވެ. އެހެންނަމަވެސް އޭނާގެ އެއްވެސް ޚަބަރެއް ނުވުމާއި ނޫސްވެރިންނަށް ތަފާތު އިންޒާރުތައް ލިބެމުންދާ ދުވަސްވަރެއްގައި އޭނާ ގެއްލުމުގެ އިތުރުރުން އޭނާއާ ބެހޭ އެއްވެސް ޚަބަރެއް އަދިވެސް ނުވުމުން މިހާރު މިވަނީ ބޮޑު ކަމަކަށް ވެފައެވެ.

ރިލްވާން ގެއްލުނީ ކީއްވެ ހެއްޔެވެ. އޭނާގެ ހިލަމެއް އެންމެ ފަހުންވީ ކޮންތާކުން ހެއްޔެވެ. ރިލްވާން ދުނިޔޭގައި އެބަހުރިހެއްޔެވެ. ރިލްވާނަށް އެއްވެސް އިންޒާރެއް ލިބުނު ހެއްޔެވެ. މިއީ ހައްތާވެސް މިއަދު ކުރެވޭ ސުވާލު ތަކެވެ. ޖަވާބު ބޭނުންވާ ސުވާލު ތަކެވެ.