August 19, 2014
މިނިވަން ނިއުސްގެ ނޫސްވެރިޔާ އަހްމަދު ރިލްވާން އަބްދުﷲ ގެއްލުނު ރޭ ދަންވަރު، އޭނާ ހުޅުމާލޭގައި ދިރިއުޅޭ އެޕާޓްމެންޓް ކައިރީގައި ގަދަކަމުން މީހަކު ވެހިކަލަކަށް އަރުވައިގެން ގެންދިޔަ މަންޒަރު ދެ މީހަކަށް ފެނިފައިވާ ކަމަށް ބުނެ، އެ ނޫހުން ރޭ ޝާއިއުކޮށްފައިވާ ލިޔުމާ ގުޅޭ ގޮތުން މީޑިއާ އަށް މައުލޫމާތު ހާމަކުރުމަށް ފުލުހުން ދެކޮޅު ހަދައިފި އެވެ.
އުމަރުން 28 އަހަރުގެ ނޫސްވެރިޔާ، މި މަހުގެ ހަތް ވަނަ ދުވަހު ގެއްލިފައިވާއިރު، އެރޭ ހުޅުމާލެއިން “ވަގަށް ނެގި” މީހާއަކީ އޭނާކަން، މިނިވަން ނިއުސް އަށް މައުލޫމާތު ހިއްސާކުރި ދެ މީހުންނަށް ޔަގީން ނުވާ ކަމަށް ވެސް އެ ނޫހުން ބުނެ އެވެ. މަންޒަރު ދުށް އެ ދެ މީހުންގެ ވާހަކަތައް އެ ނޫހުން ފުލުހުންނާ ހިއްސާކޮށްފަ އެވެ.
ނަމަވެސް މި މައްސަލަ ޕޮލިހަށް ހުށަހަޅާފައިވާ ކަމެއް ނުވަތަ މި މަހުގެ ހަތް ވަނަ ދުވަހުގެ ރޭ އެފަދަ ކަމެއް ހިނގި ކަމުގެ ރިޕޯޓެއް ލިބިފައިވާ ކަން ވެސް ފުލުހުން ނުބުނެ އެވެ.
“ތިކަމާ ބެހޭ [މީހަކު ވަގަށް ނެގި ކަމަށް ބުނާ މައްސަލަ] ގޮތުން އެއްޗެއް ބުނެވޭކަށް އަދި ނެތް،” މި މައްސަލައާ ގުޅޭ ގޮތުން ސުވާލުކުރުމުން، ފުލުހުންގެ މީޑިއާ އޮފިޝަލަކު ވިދާޅުވި އެވެ.
މި މަހުގެ ހަތް ވަނަ ދުވަހުގެ ރެއިން ފެށިގެން ގެއްލިގެން ހޯދާ ރިލްވާން އެ ރޭ ހުޅުމާލެ އަށް ދިޔަކަން ފުލުހުންނަށް ކަށަވަރު ނުވި ނަމަވެސް އޭނާ ހުޅުމާލެ އަށް ދިއުމަށްޓަކައި ފެރީ ޓިކެޓް ގަތުމަށް ފަހު ފެރީ ޓާމިނަަލަށް ވަދެފައިވާ މަންޒަރު ފެންނަ ވީޑިއޯއެއް މިނިވަން ނިއުސް އިން ވަނީ އާއްމުކޮށްފަ އެވެ.
ރިލްވާން ހޯދުމަށް މިނިވަން ނޫހުން މިހާތަނަށް އެއްކުރި މައުލޫމާތަށް ބަލާއިރު ބަޔަކު އޭނާ “ވަގަށް ނެގީ” ކަމަށް ވަރަށް ބޮޑަށް ބެލެވޭ ކަމަށް އެ ނޫހުގެ ޑެޕިއުޓީ އެޑިޓަރު ޒަހީނާ ރަޝީދު ވިދާޅުވި އެވެ.
“ރިލްވާންގެ އެޕާޓްމެންޓް ކައިރީގައި މިކަމެއް [މީހަކު ގަދަކަމުން ގެންދިޔައީ] 1:45 ހާއިރު. މީހަކު ހަޅޭއްލަވާ އަޑު އިވިގެން ބަލާލިއިރު ގަދަކަމުން ވެހިކަލަށް އެރުވިތަން ފެނުނު، އަނެއްކާ އެއްޗެއް ވެއްޓުނު އަޑަށް ގޮސް ބަލާލިއިރު ވަޅިއެއް ފެނިގެން ފުލުހުންނަށް ރިޕޯޓްކުރި،” އެ ހާދިސާގެ މަންޒަރު ދުށް ދެ މީހުންނާ ހަވާލާދީ ޒަހީނާ ވިދާޅުވި އެވެ.
ފުލުހުން އެންމެ ފަހުން ހާމަކޮށްފައިވާ ގޮތުގައި ރިލްވާންގެ ފޯންގެ ސިގްނަލް އެންމެ ފަހުން ލިބުނީ އޭނާ ގެއްލުނު ރޭ މެންދަމު 2:30 ގައި ހެންވޭރުގެ ސަރަހައްދަކުންނެވެ. އަދި އެންމެ ފަހުން ފޯން ކޯލެއް ކޮށްފައިވަނީ އެރޭ 10:19 ގަ އެވެ. ނަމަވެސް އެ ކޯލްކޮށްފައި ވަނީ ކާކަށް ކަމެއް ފުލުހުން ނުބުނެ އެވެ.
މިމަހުގެ ހަތް ވަނަ ދުވަހުގެ ރޭން ފެށީގެން ރިލްވާންގެ ހަބަރެއް ނުވެގެން، އެކަން އާއިލާގެ ފަރާތުން ފުލުހުންނަށް ހުށަހެޅީ މިމަހުގެ 13 ވަނަ ދުވަހު އެވެ. އެ ދުވަހުން ފެށިގެން އޭނާ ހޯދުމުގެ މަސައްކަތް ފުލުހުން ދަނީ ކުރަމުންނެވެ.
ސޯޝަލް މީޑިއާގައި “މޮޔަމީހާ” ގެ ނަމުން މަޝްހޫރުވެފައިވާ ރިލްވާނަކީ ދީނީ ގޮތުން ހަރުކަށި ވިސްނުމުގެ ޖަމާއަތްތަކަށާއި ދީނީ ބައެއް ކަންކަމަށް އަދި މި ސަރުކާރުގެ ސިޔާސަތުތަކަށް ވެސް ފާޑުކިޔާ މީހެކެވެ.